Mat 18 | MCQ | STEP | 'Enareja ijihuni vea kajino Huni tisaiporuepo roe Jesu apoma ijá 'wava Godoni arijino ea natohwijaho irane 'wavara.

Matthew 18

Irara Natohwane?

(Maka 9:33-37; Ruku 9:46-48)

1 'Enareja ijihuni vea kajino Huni tisaiporuepo roe Jesu apoma ijá 'wava Godoni arijino ea natohwijaho irane 'wavara. 2 'Ejumakame Jesura kasimaa pina 'umejume Huni roumakame Hu apenapi puni una'i ranavume naminana. 3 'Ene ijá 'iama Na nimai ja 'waravu ja pata'arohe roe kasima sa'ina pare'avajaho ja Godoni ara niho'o pakahuna. 4 Ea irara masuani ajuarane areri ike kasima ka'ina renujara Godoni arijaho ea ni'ina. 5 'Enakaivo ea irara Nuni iha 'ahi kasima ika'ina'e hami apenujaho hu Na apeniuna.

Sisea Ve'avarono Vena Kivujina

(Maka 9:42-48; Ruku 17:1-2)

6 'Enakaivo kasimakipo Na nimai ro'eje ei pini veje amaaresume ta'arohe ani ro va'amajaho maijaho ja muna ka'ene natohwijino apene huni uroa 'ahi vevahamareje pi'onave va'e sohi vaji 'o'amajaho ja mamai vehuna. 7 'Enakaivo iki mwe'i sisea namujihuna'e ijihuni eha namu kaivo ike mwe'a kehuni eijipo veju'e ea 'aho'a sisea vejura'omo ea kajihipuni eha ka'ene mihunijaho namu. 8 'Enakaivo oni ijina ho mumori vena'e a sisea ve'amajaho ijaho 'uhua ato'aruve va'amana. Maijaho a núpúvi'i onareje majama hihuna apehuna. 'Enakaivo a ija mumora no'o no'o re'amajaho a va'e vena ka'ene pautaruti savi'inijino rehuna. 9 'Ene oni niijara vena'e sisea ve'amajaho tajahene apena 'onave va'amana. 'Ena'avo maijaho a nia kwinu apene majama hihuni kwaijaho va'e marahuna kaivo nia no'o re'amajaho vena ka'ene majama reji'i namujino pi'onamahuna.

Sipia Ranama Savajihuni Haijina

(Ruku 15:3-7)

10 'Enakúne ja hami vwihaha. Kasima ika'ina niho'o pasena'avara. Na nimaa nimaa ja 'waravu. Puni ona oji'ina ka'ene kahi akúpa 'ahi hijujipo na'ia mapoka'e Nuni Omijihuni una'i va'a roura. 11 'Enakaivo Ema Puni Harihijara roajaho ea ka'ene pivusaha ojuji ni'aji'i roana. 12 'Ena'omo ja ichá'ina vwihajo? Ei pini huni sipia mapoka mapoka (100) nami'ira'omo kwino paka'ipisa hu ichá veja'e? 'Ú hu 'aho'a ka'ene (99) ijija huri'i irechami'i kaivo va'e kwinu'wi sava raka? 13 Na niho'o nimaa ja 'waravu hu (99) ijí ki'amajaho teamava'a kaivo kwisu'wi pivunonaji piuna'amajaho niho'o teamama parahuna. 14 Areri ija'ina'e joni Oma ka'ene kahi akúpa 'ahi hinujaho kasimapo kwinu'wi ani ro va'e pivuhuna ura parenu.

Ea Pini Sisea Ve'amajaho

15 'Enakúne oni ei pini a sise'i 'ahaa ka'amajaho a'asu hemi va'e hu hu'úmo 'wama amairi'amana. 'Eje hu oni ira he'amajaho mamaa vehuna. 16 'Enakaivo hu oni ira paheja ka'amajaho a ea no'ona ho no'opisu raki aherama pu pu'úmo va'amana. 'E'irakúne hu ja ichá 'ahi'amajaho pura kama he'avara. 17 'Enakúne hu joni ira paheja ka'avajaho jara sosi nahama 'wara'avara. 'Eje hu ijí paheja ka'avajaho iji'a maka'eje Jenitaru rene 'ee takisi apeji'ina re'amana.

Vehuna 'Aho Pavehuna

18 'Enakaivo Na nimaa nimaa ja 'waravu uneunecha ka'ene jara iki mwe'i kamo'avajaho akúpa 'aha 'u'o kamohuna. 'Ene jara iki mwe'i rasa'avajaho akúpa 'aha 'u'o rasahuna. 19 'Ena vukú'o na pina 'wara'i veju. 'Ene ja ea no'o ahume iki mwe'i nimaa ve'i kaivo siporua 'one unenu'u pina'e jari'avajaho Nuni Oma ka'ene akúpa 'ahi hinujara eha vehuna. 20 'Ene ichihi ichihi ea no'una ho no'opisu Nuni iha 'ahi ahu'avajaho Na ijino puni vaji hihuna 'iamana.

Pwei Huni Napura Pavwihana Aremajihuni Haijina

21 'E'eme Pitara Jesuni roe ijá 'wama Natohwe nuni vwei na sise'i 'ahi'amajaho 'aha icharu na vwihana are'ejo? 'Aha iropu no'o vwihana are'ejo? 'wavume 22 Jesura ijá 'wama Na 'aha iropu no'ohe'ina pa'wavu kaivo 'aha mapoka mapoka (70 x 7) vwihana are'amana. 23 Ikehuni hahi Godoni arijaho areri kini pini huni pwehipuna'i huni monia hura vajihaji piuhi'amaja'ina. 24 'Ejumakame vea ka'ene hu pwehwaha piuhiani veijaho ea pina monia mapoka mapoka (K10,000,000) pukini ma'ekana. 25 'Ena'omo huni monia eha vajahuna areri parejukame huni natohwijara pikinavi'i ijá 'wama Na a oni napara 'ee sesahuana 'ee uneunecha ona ka'ene navujaho ijá 'eka va'e nuni monia eha 'imena 'ekahuna 'wamana. 26 'Ejumakame huni pwea huni una'i aruha arihe jarime ijá 'wama Natohwe a 'aji'eje nara uneunecha mapoka eha venahuma 'wamana. 27 'Ejakame huni natohwijaho niho'o ijara teamuma parajume monia pukini venajaho vwihana are'i kaivo makavuma va'ana. 28 'Enarena pwea kajaho 'e'una va'e huni napura pwea pina ka'ene hununa'i monia (K20) pukini naminajaho piuname uroi 'ena apene musavi'i ijá 'wama Ara nuni monia ka'ene pukini vene inajihuni ehiji vajiha 'wamana. 29 'Ejumakame pwea kajara huni una'i 'one navi'i jarime ijá 'wama A na ajiha na iji'a eha vajahuna 'wamana. 30 'Enakaivo hu huni ira pahe'i kaivo apene tipura ranavume ijí monia kajihuni ehiji vajahumakavi'i iji'a ranamana. 31 'Ejakame pwea pwina ijipo hura venaji kamareja pu niho'o temukavume va'e puni natohwa iraka ka'ene renajaho nahama 'waravara. 32 'Ejumakame hu pwea kajaho 'umejume ijí roume ijá 'wama A niho'o pwea sisea. Nuni chimua ka'ene onuna'i namajaho na vwihana'e arevuta. Ijihuni maijaho a na jaririvumakame na vwihanae are'ika'i makavume

Noina va'ana. 33 'Ena'omo na a numiravu ja'ina'e a oni napura numi'ipisa areri reja'a? 34 'E'ikaivo ea natohwijaho ajivume huni pwea kajaho apena va'e tipurai raname monia kajihuni ehijaho vajihakama'e iji'a ranahuna. 35 'Ena'omo a vweupuni sisea pavwihana are'amajaho Nuni Oma ka'ene kahi akúpa 'ahi hinujara a 'u'o pavwihanae arehuna 'wamana.